El maga leyenda de Zamboanga bien interesante para oye. Esos ta entretene mucho con el maga gente especialmente con los maga niños y niñas, y tambien con el mismo de edad. El leyenda no hay siguro el verdad. Puede el decir que este leyenda verdad ya sucede o puede ser producto de la imaginacion solamente.
….Especialmente el tiempo de antes cuando el maga sucesos no puede explicar por medio de siencia. Tiene leyenda ta habla que modo ya saca el un nombre de un lugar por medio de un sonor de los animales y cosas como resulta de un suceso ta causa el ambiente. Aqui tienen los ejemplos de las explicaciones:

*****


I.

EL LEYENDA DELA ISLA STA. CRUZ

….El año antes del llegada del maga Español na Filipinas, el maga barco de estrangero ta vene de vez en cuando para cambia cosa producto nativo. Uno del maga barco estrangero ya pundia na un isla serca na Zamboanga, pero jendeh de adrede el pundiadades de na aquel isla. El razon por causa del fuerte viento, que ya cambia el ruta del barco cay ya tiene miedo el maga pasajero pati el maga tripulante del barco.
….Uno del maga pasajero amo un rico negociante y el de suyo jovencita mujer. Cuando ya pundia el barco na isla, el maga tripulante y pasajero ya abaja para busca cosa puede sila come. Un grupo de bandido ya ataca canila. Con el capitan, con el negociante y otro maga pasajero ya mata estos maga bandidos. Con el jovencita mujer del negociante ya lleva el maga tulisan para hace unu del maga mujer del diila cabezante. El jovencita mujer ya reza y ya pidi su muerte. Ya prefiri le muri que ay queda le un muchacha.
….Aquel noche, ya tene un tipon. Ya queda iscuro el cielo y ya cay fuerte ulan. Ya tiene quirlat y temblor. Ya tiene miedo el maga bandido por el mal tiempo y ya olvida sila con este bonita mujer.
….Ta cre el mujer que ya oi el Dios el disuyu rezo. Cuando media noche ya, ya mira le un cruz. Ya desata le el amarro na desuyo cuerpo y ya queda le libre.
….Ala mañana, bien silencio. de lejos, ya mira el un mujer un barco. Ya hace le tastas el cuantos parte del desuyo camisa y ya hace le paypay con el barco que ta atraca serca.
….Antes sila de sale, el jovencita mujer ya pidi gracias con el Señor cay ya salva le na desgracia. Por causa del milagro del religioso cruz, ya nombra le el isla Sta. Cruz.


Analisis:
….Generalmente, el mga leyenda como siempre ta presente el elemento de Dios. El Dios firme ta salva y ta hace lejos con el un o contodos con ellos salva na peligro. Y tambien el caracter tiene di suyo fe que este salvacion que ta sucede, este el ayuda del Dios siempre. En literatura critisismo se llama “deus ex machina”, quiere decir sin no hay el expectacion con el ayuda, como siempre, la ayuda ta llega.

II.

EL LEYENDA DEL NUESTRA SEÑORA DE LA VIRGEN DEL PILAR

….Este historia acerca de un incidente que ya socede durante de un ataque que ya hace el maga Moro na Moralla del Pilar. El historia ya principia cuando el imagen del Nuestra Señora de la Virgen del Pilar ya marca na dindin del moralla. Tiene aquel un relihioso ocacion poreso ya tene tambien procession para del Nuestra Señora de la Virgen del Pilar. El maga Moro ya ataca con el Puerto sin saber del maga Español. Na diila apuro para escapa, el maga Español ya ulvida lleva con el imagen del Nuestra Señora del Pilar adentro del moralla. No hay sila abre el puerta hasta por la mañana.
….Ala mañana, ya sabe sila que el imagen no hay mas na lugar donde este estaba parao. Cuando ya hace sila embuscada, ya encontra sila con este na un pader del moralla. Este el puesto donde ya aparece antes el la Virgen que ta cre un milagro ya socede.


Analisis:
….Aqui tambien tiene elemento de Dios con el persona de un santa. Este que ta significa mucho que cuando aquel tiempo de Español sila ya dale un legacia con el maga gente el un religion cristianismo. Poreso, muchas veces, el maga istoria como siempre las leyendas tienen los elementos de milagro del Dios que ta representa el maga diferentes santos y santas, porque ta cree sila que estos el maga representacion de Dios. El seguientes leyendas que ta conta cerca de maga santos y santas.

III.

EL PRIMER MILAGRO DEL NUESTRA SEÑORA
DE LA VIRGEN DEL PILAR

….Un noche el sentinela Españoles estaba durmido na costao del moralla infrente del mar. Derrepente ele ya desperta cay tiene ya agarra na desuyo hombro y ele ya oi un boses ta habla:
….“Despierta, cay moros la costa”.
….Cuando ya desperta el sentinel, ya puede le mira un bonita mujer con bestido blanco.
….Ele ya grita, “Alto! Alto! Quien eres”? como no hay contestacion, ya apunta le su fusil con el mujer y cuando para tira ya le, ya oi ele con este ya habla:
….“Sentinela, por que el paso niegasel alba del dia? Si conoses Maria, porque le gritas el alto”?
….Ya estraña el guardia. Ensigidas le ya hinca y ya habla,
….“Perdona señora mia, Madre de mi Corazon, Soy un pobre sentinel,
….Que cumple mi obligacion”. El mujer ya desaparece sin hablar otro palabra.
….El siguiente dia, el guardia ya abisa con su comandante official el que ya socedea quell noche pasado. Para sabe si ele ta habla el verdad, ya quema sila el dedo de su mano derecha por un hora. Masquin bien callente gayot el fuego, e maga dedo del soldao no hay quema que ya aprova el verdad del historia del sentinela.
….Despues de cuantos dias, el guardia ya queda enfermo. Ele ya queda grabe y ya muri. Pero ya puede mira el de suyo maga compañero soldao que el sentinela bien contenta con el de suyo muerte.


Analisis:
….Nota que popular el maga nombre del un sitio como el nombre de santo o santa. Actualmente y generalmente este ta sucede como siempre de es un caracter dela mujer. Este un prueba tambien que el antes maga tiempo, el mujer es un conocido poderoso na sociedad.

IV.

EL LEYENDA DE STA. CATALINA

….Antes ta llama este lugar Balete. Un nativo de este lugar, si Evangelista el ya puede compra pedaso de tierra. Ya queda sila alli por cuantos años, cay tiene sila diila negosyo de maquinaria.
….Tiene tamen un mujer ya queda alli, el nombre si Catalina. Ya cumbida le con el maga gente para tiene un miting para hace sila un capilla. Poreso, ya nombra sila el lugar Sta. Catalina por causa de santo ya icha alli. Hasta ahora, Sta Catalina el nombre del lugar.

V.

EL LEYENDA DEL SAN ROQUE

….Antes, el nombre de este barrio amo el Tipung. Un di el cholera ya man calayat en este barrio que ya causa el muerte de mucho maga gente.
….Un padre na nombre de Sancho, ya oi acerca de este triste pasada. Ya tiene ele lastima con el maga gente, poreso ya manda ele con estos reza, especialmente con el santo que ta llama San Roque. El maga gente ya reza como ya mand canila el padre. Ala tarde, el cholera ya descansa de man kalayat.
….El maga gente y acre que el santo amo el ya salva canila des del enfermedad. Para expresa diila gratitud, ya planta el maga gente un ermita para con el santo. Ya hace sila con este el santo patron y ya llama tamen sila con este lugar San Roque.

VI.

EL LEYENDA DEL SAN JOSE GUSU

….Antes de vener el maga Español na Zamboanga, este barrio conocido ya como Gusu. Mayor parte del maga gente de este lugar maga pobre sementerero. Ta siembra sila maga gulay y otro siembra para omenta na diila la vida. El maga gente de Gusu relihioso.
….Tiempo de aquel no hay ulan, el maga siembra ta acaba ya seca y tiene miedo el maga gente si palta el diila comida. El mag agente ya planta un ermita y ya reza para tiene ulan.
….Un dia ya vene un fuerte ulan en este lugar. El agua ya queda hondo. El maga nativo bien tiene miedo poreso ya sale sila en aquel lugar. Tiene man maridable Viejo y vieja el ya queda na lugar cay masquin chiquito lang el diila casa, alto este. Tiene sila fe con el Dios y sabe sila cay este feamo ay salva canila.
….Ala madrogada el ulan ya descansaya y el man maridable ya anda na ermita para reza. Ya mira sila un sombre na distancia. Cuando ya atraca sila con el sombre, ya mira sila un Viejo con largo barbas.
….El Viejo ya habla:
….“No tiene miedo cay yo el responsable del de iño salvacion. Yo no hay otro sino si San Jose. Ya puede yo mira si que modo de grande el de iño fe con migo. Anda camo canila y habla si cosa yo ya explica caniño”.
….Por la mañana, cuando ya bira el maga gente, ya mira sila maga casa jendeh destrosao. Y para dale honor con el santo que ya queda canila durante el tiempo de necesidad, el maga nativo ya decidi de cambiar el nombre de este barrio na San Jose Gusu.

VII.

PAQUICHURA EL MERCEDES YA SACA SU NOMBRE

….Antes de llegar el maga Español, ta llama con este lugar Paso caña, que quiere decir lugar de maga caña. El razon cay mucho pono de caña que ta crece na areredor.
….Cuando ya llega el maga Español, ya hace sila levanta un iglesia na aquel barrio. Cuando primero, ya coloca este na centro del barrio, pero cay ocupao aquel barrio ya cambia el iglesia na mas silencio lugar donde parao el liglesia ahora. El patrona del lugar amo el Virgen de la Mercedes.
….Desgraciamente, ya queda bien hambre el maga gente na barrio y mucho diila ya acaba muri por causa del enfermedad de cholera. Mucho gayot ya muri por causa del epidemia y ya llega un tiempo, cuando tiene diez gente enterao na un sepultura.
….Con este calamidad, el maga gente ya resolva con mas rezo. Ya anda sila na iglesia para reza. Ya hace sila novena por nueve dias y despues de nueve dias, el epidemia ya disaparece. Na pensamiento del maga gente, este el resulta del diila promesas, poreso ya oferece sila misa de gracias en honor de la Virgen de la Mercedes.
….El maga gente ya decidi que nombra sila el lugar Mercedes embes de Paso Caña. Desde aquel tiempo y hasta ahora ya permanente el nombre del lugar como Mercedes.

IX.

EL LEYENDA DEL STA. BARBARA

….Mucho años que ya pasa, tiene ta queda un rey Mohametaño. Tiene le un hija si Barbara. Ele el bien bonita princesa na diila reino. Bien Bueno le na di suy maga gente. Por eso quierre con ele maga gente cay tiene le Corazon de un Cristiano.
….Todo el maga principe na reino quierre casa con ele. Pero si Barbara jende ta pone atencion ni uno canila. Su tata quirre que ele hay casa ya antes de sera suyo ojos, pero ele no quierre pa casa.
….El princesa Barbara tiene un Catolico amigo. Ele Bueno y bien fiel. El princesa ya aprende ya ama con este mujer como su Hermana. Ta anda sila na un lugar donde el rej jende puede mira canila. Este mujer ta habla todo por causa del di suyo religion. Ta dale le con el princesa maga libro Catolico que ta le el princesa durante el di suyo tiempo no hay le que hace.
….Despues ese dos man amiga ta anda na iglesia Catoloco secretamenta. Un dia si Barbara ya atraca con su tata, ya pidi le permiso con el rey si puede le cambia su religion. El cambio el rey ta manda con ele casa. Pero si Barbara jende siempre ta cre con su tata. Ya precura le convince con su tata pero amo lang siempreel razon ta dale su tata con ele.
….Un dia cuando el rey ta descansa na un cuarto, el princesa Barbara ya atraca con su tata y ya habla ya tamen. Pero su tata jende siempre ta dale su permiso. El rey y el princesa ya tiene discuscion. Si Barbara ya habla con su tata cay ya bautisa ya con ele na iglesia Catolico, cuando ya oi ese el rey, ya saca le su espada y ya curta le el pescueso di Barbara por causa de su rabia. Cuando si Barbara ya queda Santa, el lugar donde sila ta queda ya nombra despues de su nombre.
….Ahora este ugar ta llama Sta Barbara. Si Sta. Barbara uno tamen martir

X.

EL MILAGRO DEL SANTO NA TABLA
LA VIRGEN DE LA SOLEDAD DE DOLOROSA

….Un aga, un vieja que ta queda na Sta. Maria ya anda baña na sapa del San Ignacio. Ya lleva ele su maga masucio ropa para lava y el un tabla que ta hace le pukpukan. Aquel tabla que estaba un lamina de un Santo que ta llama sila La Virgen de la Soledad de Dolorosa. Como tiempos ya pasa, ya derriti yaa quel Santo na tabla que ese vieja ya hace gane pukpukan.
….Cuando ta baña ya el vieja, ya puede ele mira tiene figura de Santo ta aparece na tabla. Cuando ya mira le vieja con el Santo ya ulbida ya le el bañada. Ya volve ele y ya llama con el maga vecinos.
….El maga gente ya hace ofricimiento como novena y Sto. Rosario. Ya continua el maga gente, y el vieja tambien con el diila rezada.
….Hasta como que despues de tres dias, ya acorda el vieja que el desuyo pelo lleno de gata de coco y ya ulvida ele baña. No hay dura ya queda ele baryao.
….El Santo na table ya guinda na mano del vieja Damasa. Ya puede ele mira que el Santo ta queda claro año mas año.
….El vieja Damasa tiene dos anak, canda Candida y Gregoria. Este familia tiene grande devocion y amor con el religion Catolico. Tiene un Español ya regala con el vieja Damasa un novena acerca de este Santo que tiene nombre La Virgen la Solidad de Dolorosa.
….Ya siguereza que reza el familia. Cuando aca tres noches de rezada, el Santo ya tiene bonito olor. Ya ole este sila olor bien oloroso.
….Ya busca sila el origen del olor y ya sabe sila que ta sale este na altar. Ya hinca sila na altar y ya reza. Despues de rezar, ya besa sila el pies del Santo cay cuida sila con ese y tiene sila fuerte fe con Dios.

XI.

EL MILAGRO DEL PATRONA DEL BOLONG
NUESTRA SEÑORA DEL ROSARIO

….Aquellos tiempo, cuando poco Cristiano lang ta queda na Bolong, el maga Muslim pirmi ta anda na ese lugar con el intencion de roba con el maga gente.
….Un noche bien iscuro, mucho vinta de Moro na canto dela playa. El diila intencion derrepente ataca con el maga Cristiano. Antes de pundia el maga Muslim, un mujer que ta agarra largo bijuco el que ya puede sila mira na aplaya. Ya grita kanila el mujer “Bueno pa biraya camo otravez y si jende tiene grande desgracia ay llega caniño”.
….Sin creer el orden del mujer, los de mas del maga Muslim siempre ya abaja. Cuando serca ya sila na mujer, ya descubri el maga moro que bien bonita el mujer y el pelo bien largo. Por e miedo ya corre el maga moro otravez birando na diila vinta y ya sale.
….Ya salva el Bolong. Ta cre el maga gente que el mujer el La Virgen del Rosario. Desde aquel tiempo, el maga viviente de Bolong ta celebra el fiesta de La Virgen del Rosario todo el primer Domingo de Octubre.

*****

Donde Estava el Nombre? Estos son maga leyendas que ta explica cerca de los nombres si que modo ya nombra los lugares. Conforme esta, el maga istoria tienen los elementos de animals, los sucesos que ta causa los ambientes. Una suceso que ta obserba aqui es amo el ta llama na ingles el “communiation gap”. El español y el nativo como siempre no hay entiende a uno y otro si cosa gayot el pregunta. Por eso ansina ya resulta y ya forma el nombre de un lugar. Aqui abajo tienen los ejemplos que ta explican estos:

XII.

PAQUICHURA EL QUINIPUT YA SACA SU NOMBRE

….Antes, el Quiniput bien cubrido de arboles. No hay ni un Cristiano ta vivi alla solamente un familia de Muslim que tiene anak bonita. Tiene sila bonito casa y jardin areredor. Mucho oloroso flores ta crece en equal jardin. El anak diila bien quire gayot con el maga flores, poreso ta cuida le con estos buenamente. Alli ele ta pasa el tiempo na cuidada del maga flores que ta inclui maga bonito rosas. Antes ele de sale na ardin, jende le ta olvida besa con estos maga flores.
….Un dia, su tata y nana tiene donde ya anda. Ya promete le sus padres que jende le sale na casa.
….Cuando no hay mas alla su maga mayores, ya encanta el mujer con un rosas blanco na jardin. Mientras ta besa le con el blanco rosas, un Español ya puede pasa na diila casa. Ya queda captivado el Español na hermosura del mujer y el florida del jardin.
….Ya atraca el Español con el mujer y ya prigunta le elnombre del diila lugar. No hay el mujer entende con el Español. Ta pensa le que ta pregunta el Español sicosael color de aquel flores.
….Ya contesta le, “Quiniputi” quiere decir (este blanco).
….El Español jende contento. Ya prigunta le otravez y ya recibi le el mismo contestación.
….Desde aquel tiempo, aquel lugar ya queda nombrao Quiniput que ya sale na maga palabra Quiniputi.

XIII.

EL LEYENDA DEL CURUAN

….El barrio de Curuan es un lugar cincuenta kilometros desde el ciudad de Zamboanga. Antes de llega el maga Español na Filipinas, maga tribo de Mohamedanismo amo el maga nativo del barrio Curuan. Con estos ta llama Moro. Sila ta queda na costao del rio y magaeurilla del mar, cay sila ta anda pesca para diila busca vida. Bien religioso gayot estos maga Moro y ta pasa sila diila tiempo lee el biblia que ta llaman “Koran”.
….Cuando ya llega el maga Español na Zamboanga, ya anda sila na maga differentes lugar. Ya lista sila el maga nombre del maga lugar adentro del Zamboanga.
….Na uno de estos lugar, ya atraca sila con el un Moro que ta lee libro y ya pregunta sila acerca del nombre del lugar. El Moro cay deficil man le entende, ya pensa que ta pregunta con ele si cosa le ta le. Ya contesta ele “Koran”.
….Pensa ba el maga Español, aquel el nombre del lugar, poreso hasta ahora, Curuan el nombre de este lugar que ya sale na palabra “Koran”.

XIV.

PAQUICHURA EL TETUAN YA SACA SU NOMBRE

….Durante el largo tiempo de noventa años, ya manda sale na Filipinas con el maga padre Jesuitas y despue ya permiti canila volve ole aquel año del 1859, que ta condici con el cayida de Morocco na mano del maga Español y el caso cuando ya cautiba el importante Puerto y ciudad de Tetuan na ese pais.
….El maga Jesuita ya bira ole na Zamboanga el año de 1862 y ya saca sila el posesion o cuidao del parroquia que antes estaba na mano del maga parroquia del barrio de Lama-lama que ya pone sila nombre del mismo puerto ciudad de Tetuan, igual na ciudad de Morroco na lugar parte del Norte de Africa.
….El primer padre parroco era el padre Jesuita Ramon Barva y el primer bautismo bajo del de suyo administracion ya socede el fecha 3 de Enero, del año 1963, que ya señala el fundacion oficial del barrio de Tetuan. El primer sentenario del barrio de Tetuan ya celebra tamen por fin el dia de Enero del año 1963.

XV.

EL LEYENDA DEL BUNGUIAO

….Tiene un Viejo despues ya acaba le sena ta descansa na su corridor. Maga gato abajo ta man pelia jan y bien alboroto gayot. Como un acto de Dios, un coco laya cay na insima del gato. El sunor del cayida del coco ansina: “bung!”. Como ya sinti duele elgato, este ya grita “ngiao!”.
….Desde aquel tiempo, si ta pregunta con el Viejo maga gente estaba na otro lugar si cosa el nombre del barangay, ta contesta ele “Bungiao”.
….Hasta ahora este lugar conose na nombre Bunguiao.

XVI.

EL LEYENDA DEL SINUNUC

….Antes, el quien ta vigila con el Sinunuc am el maga Moro, pero tiene tamen maga Cristiano que ta esta all na comunidad. El maga Moro ya ocupa el bocana, el lugar na boca del rio, mientra el maga Cristiano ya estana interior donde ya cultiva sila el diila sementera para siembra mais y coco.
….Durante aquel tiempo, no hay pazall na lugar. El maga Moro ta ataca con el maga lugar del Cristiano. Ta mata con el maga hombre. Con el maga mujer ta lleva na maga datu para queda mujer de estos, mientras con el maga bata ta vende sila omo muchacho con el sultan de Jolo.
….El barrio aquel tiempo no hay pa nombre, y el maga Cristiano y maga Moro no hay union con uno’yotro.
….Un aga, fecha 28 de Mayo, 1900 mientras el maga Cristiano ta celebr diila fiesta, un hombre ya grita “Ta quema el maga Moro con el ermita y maga casa”!
….El maga Cristiano ya corre na gulod. Despues, un gente el nombre de Kikong ya grita na Tagalog, “Ay Diyos ko, sinunog ang akin tahanan!”.
….Cuando ya sale el maga Moro, el maga Cristiano ya volve ya na diila maga casa. Ya llama sila un conferencia para rehabilita el diila barrio que ya queda destroso del quema.
….Desde aquel tiempo, con este barrio ya llama ya Sinunuc.

XVII.

EL ALMA AGRADECIDO

….Si Graciano un hombre bien guapo y mucho maga mujer ta hace apas y quiere conele y uno ya de estos si Isabel. Ya man novio sila pero jende deverasan el amor di Graciano cay ya hace lang le tonterias con ese mujer. El resulta, ya tiene si Isabel un anak.
….Un dia, ya tiene accidente si Graciano y ya muri le. Pero no hay recibi su alma na cielo por causa del tonterias ya hace le con Isabel. Ya manda bira su alma na mundo na forma humano para puede le paga el tonterias ya hace le. Necesita le suporta con Isabel y su anak antes de recibi con ele na cielo.
….El alma de Graciano ya saca el forma humano como nombre Pedro.
….Na este lugar tiene un soltero, si Manuel que ta busca un jardinero. Este si Pedro yaa ndapresenta para queda jardinero de Manuel y ya quiere si Manuel con este si Pedro y ya emplea le como su jardinero.
….Ya trabaja si Pedro buenamente com jardinero y todo’ldia ta pone le dies cena bajo del petate de Isabel como mantencion desuyo y del diila anak.
….Mientras tanto, el jardin que ta cuida si Pedro ya queda atraccion de aquel lugar cay ya queda este bien bonito. Mucho maga gente con alegria ta anda mira con este bonito jardin. Si Manuel tamen ya nota el buen trabajo de Pedro.
….Pero ya nota tambien si Manuel que tiene un lugar na jardin pirmi tiene fuego pero jende ta déjà rastro de pugera. Ya pregunta le con Pedro aserca de este y ya contesta conele el jardinero “ñor, pensaba yo jende uste ay mira con aquel fuego. Pero Bueno tamen para sabe uste el verdad”.
….Ya estraña si Manuel. Jende le ta entende si cosa quiere decir si Pedro con el palabra “el verdad”.
….Ya explica si Pedro que ele un alma ya manda bira na mundo para puede le suporta con Isabel y su anak como pago de su tonterias con elmujer. Aquel fuego ta aparece na jardin amo el extencion del porgatorio, el lugar donde ya sale el alma de Pedro.
….Cuando ya sabe si Manuel el verdad, ya pidi perdon si Pedro y ya despidi ya para puede busca otrot rabajo. Pero cay buen jardinero si Pedro, no hay conforma si Manuel que sale le y ya ofrese le casa con Isabel si ay continua si Pedro cuida con el jardin. Ya consinti si Pedro y ya casa si Manuel con Isabel.
….Despues mucho años, si Manuel y su familia yaanda man vacacion na otro lugar. Na media del mar, ya alcansa canila un mal tiempo. grande-grande el marijada, poreso este si Manuel ya cay na mar.
….Embes de sumi no hay man lang muja si Manuel o ni topa con ele el marijada. Arriba lang le del agua y dao suspendido na aire. Ansina lang hasta ya llega le na un aplaya.
….Cuando ya pisa le ta tierra, ya conversa con ele el alma di Graciano na forma humano di Pedro. Ya habla este que ele dao amo ya carga con Manuel hasta na aplaya cay si Manuel el ya salva con el desuyo alma por el mal que ya hace le con Isabel. Ahora que ya salva le con Manuel puede ya le pidi gracias.
….Despues, ya despidi ya le con Manuel para bira na cielo.

XVIII.

EL BULA’Y FUEGO NA PONO DEL MANGA

….Antes el maga casa na barrio de Zamboanga cerca na sabana y alla mucho pono de manga. Si didia, ta anda el maga bata alla juga escondijan cay buug-buug gane sila. Pero principia tarde hasta de noche, tiene gayot miedo el maga bata and alla cay tiene dao ta sale bola’ y fuego.
….Ta habla el maga Viejo y vieja que antes cuando tiempo del Guerra el maga Hapon aqui onaton bien mal gente. Necesita pa gane agacha canila al encontrar, sino ta llama sila con el maga Zamboangueno despues ta palmadia.
….Cuantos meses ya pasa, despues ya vene ole el maga Americano guerra gayot sila contra el Hapon. Alla donde na maga ya hace “foxhole” el maga Hapon despues ya espera sila con el maga Americano. Todo el maga Hapones ya muri alli pero ni un Americano no hay muri porque ya ampara canila el Señor.
….No hay puede sub na cielo el maga alma del maga Hapon cay mal gente sila. Alli sila ahora na manga ta patiga. Esos bola’y fuego que ta sale alli tiene vezamo el alma diila. Hasta na fin del mundo alla estos ya esta.

XIX.

EL LEYENDA DEL PULONGBATO

….Un distancia lejos poquito na un monte ta llama Pulongbato, tiene un Viejo rancho Subano que tiene cabezante ta llama sila Tinnuay Arusin. Este si Tinnuay tiene anak el nombre si Pulong, quien ya tiene amor con Haridya, el Hermosa hija de un prominente Mohamedano que ta queda na otro rancho, ta llama sila Mulu-Muluan; situado en el mas punta del Sur de Mercedes.
….Estos dos man novio bien quire gayot con uno’y otro, pero el mayores di Haridya no quire con Pulong desde primero pa cay ele era un pagano. Dos veses ya nega el mayores di Haridya cuando ya pidi le el mano del de su novia. El dos man novio como ta mira sila el imposibilidad de obtenere consentimiento del mayores del novia, con el intencion para casa, ya dicidi sila jui.
….El noche del diila juida, bien bonito el noche, bien lleno de estrellas y el luna bien brillante na entero lugar. Como alas siete del noche, ya llega si Pulong na lugar donde sila tratao man encuentro. Ya amarra su caballo cerca na casa di Haridya. Si Haridya ta espera donde el puerta de su casa.
….“Taqui ya gale tu Pulong?”, habla le.
….“Si, para cumpli mi promesas”, ya contesta si Pulong.
….“Vene ya, anda ya quita pronto. Ta tiene yo miedo”.
….“No tiene miedo mi amor, vene ya”, habla si Pulong Y agarrando el intura di Haridya, ya hace subi y ya manda embarca ensima del caballo. Ya munta le enseguidas y ya manda corre con el caballo. Si Haridya con miedo y ta tembla el voz ya pregunta, “Donde tu ay lleva conmigo?”.
….“Donde? Na mio casa alla na diamon sitio”, ya contesta si Pulong.
….En este momento, el man novio ya oi un ruido como un puerta ta abre y un voz ta habla. “traidora! Mal Hermana! Tiene voz que paga este!”, el gritos del hermano di Haridya.
….Ya pega si Pulong con su caballo y fuerte este ya corre. Yat ravesa sila maga diutay monte y rio sarenal. Compiao si Pulong que jendeh mas canila ta hace apas y qui ya puede sila descanza un rato na un lugar na pies del un monte, ta llama Campana. Aqui, si Pulong ya precura conforma con Haridya cay triste y tiene miedo por el echo diila.
….Derrepente ya oi sila un ruido de corrida de caballo.
….“El hermano tuyo que ta hace apas canaton”, ya habla si Pulong con Haridya.
….“Ay!”, llorando ya grita si Haridya. “Si alcansa le canaton, jendeh le ay perdona canaton”. Otravez ya munta sila na caballo ya sale sila. Pero ya puede lang sila llega na un punta de un monte que tiene maga piedra grande donde uno puede mira el hondo precipicio.
….Cuando si Pulong ya mira que ay alcansa ya canila, ya abaja sila na diila caballo na canto del precipicio. Y si Pulong ya habla, “ya llega ya el hora necesita tu tiene fuerte resuello y valor”.
….En este momento, ya llega ya el quien ta hace apas canila y ya grita el hermano del mujer, “Haridya, ahora ay paga voz el cosa vos ya hace!”.
….Ya abaja na caballo el hermano de Hariya y jilando con su agudo kris.
….Si Pulong ya aguanta el mano del hermano del mujer y ya habla, “Si ta estima voz el vida de voz Hermana, no mas voz pursigue de voz intencion”. Sin dar con el tiempo de contestar, Si Pulong y su novia ya salta na precipicio. Y desde’l hondura no hay nada que el hermano de Haridya ya oye solamente mas que el quejas del dos man novio.
….El hermano ya volve na casa y ya conta el incidente con sus mayores. Desde aquel tiempo, durante el noche claro el una, triste quejas ta puede oye na precipicio que ta sale con el dos man novio que no hay tiene suerte na vida. Por causa del quejas y trahedia ya socede, ya llama con el lugar Pulongbato, un alto monte de piedra.

XX.

EL CIRUJANA

….Tiene un cirujana na un sitio na Zamboanga. Cada vez quien ta anda conele para cura ta volve Bueno, el gritos del mga bata que ele ta suba.
….Antes, ele jende pa cirujana. Ya principia lang este despues de acabar aquel un soceso na vida di suyo.
….El cirujana antes joven pa y uno lang el anak cuando ele ya enferma. Ya queda gayot ele malisimo y ya dale ya con ele compesa el padre. Despues ya muri ya le.
….Llorajan ya el maga parientes de suyo alla na hospital pero bien espanto gayot sila cay despues de cuanto minute ya abri el su bandera de suyo maga ojos.
….“Dale camo con migo agua, bien consequia gayot yo”, ya habla le y su voz tambien bien cansao.
….Cuando ya queda ya le bueno y talla ya le na casa, su parientes ya pregunta con ele si cosa gayot ya pasa.
….“Pensaba came muerto ya tu, cay no hay mas man de tuyo resuello y ya para ya hasta el pulso. Cosa ba gayot ya pasa contigo aquel tiempo?”, el pregunta de estos.
….“Ta camina yo aquel na un pampang, y lejos ya yo ya llega. Ya mira yo el fuente para na otrol lao del pampang. Si Mamang y si Papang ta llama un lao y ta llama con migo”.
….“Cruza ya tu Concha, para man junto ya quita. Cruza ya tu habla sila con migo”.
….“Pero Mang, Pang, no hay pa yo puede dspidi canila na casa. No sabe sila con migo”.
….“Ay sabe sila siempre ese. Cruza ya tu ahora para canila na casa. No sabe sila donde yo”, ya contesta yo canila.
….“Ay sabe sila siempre ese. Cruza ya tu ahora para camina ya quita”, ya contesta yo canila.
….“Man una ya lang ustedes. Ay hace ya lang yo apas acabar dispidi canila”. Ya contesta el su padres.
….Y aqui ya abri dao su ojos. Ya mira le llorajan ya el maga gente na alrededor de suyo y ta senti le que bien cansao ele.
….Ta pensa gayot el cirujana tiene vez si cosa caja gayot el ya pasa si ya cruza le na fuente cay su tata y nana ya tarda ya man aquellos muerto.

E L..F I N